Sube bagus ia I kedis sangsiah,mabusana sarwa putih,uling udeng kanti sandalne masih putih,cutet pang warna putih tusing dadi ade warna len,apang kedas apang suci,beneh ape tusing nak ia ngabe.Ngorahang dewekne lakar melajahin ane madan peteng kelawan galang.
Mirib sube semengan,sang surya sube endag,soroh paksine sube masi pade bangun,lakar ngelaksanaang swadharma wangsa surya,kone soroh paksi ade due,wangsa surya teken wangsa Chandra.
Saje keto? Kasujatiane tusing tawang,men dot nawang awake pedidi nakonin,yen awake ngerti munyin kedis tawang dadine beneh ape tusing, sakewale .. yen tusing,buduh,lengeh lan uyeng uyengan awake kesambat,tong kedis kaajak nutur? Seger?
Mapan sube lemah,galang kasenguh,makeber lantas I kedis sangsiah nuluh kangin,lakar mendak ida sang surya,nakonang ane madan galang,sakewale aget tusing dadi alih lacur boya kelidin,ngangsan alih ngangsan negeh-negehang ida,I sangsiah nganginang ida ngauhang.
Nepuk lantas kedis curik,ngaku ngaku dewek wangsa Surya,ane maumah di punyan majegau,mabongkol gede,mecarang bet,sakewale ngalub ambune,metakon lantas ia ne madan galang.
“Galang tongos ne di petenge,boya di lemahe” saut I kedis curik sambilang ajum ngedengang bulune lan suarane ane ngulangunin manah.
Wangsa Surya
Bawak satue,gumi remrem,sangyhang Chandra masi tusing ngenah di langite,mapan jani dina tilem,bungah keneh ne I sangsiah lakar nawang madan peteng.
Mesalin busane lantas,uling baju ngantos kancut mawarna selem,matinggah ia di punyan kepuhe, ne mentik di tengah setra,nepuk lantas soroh wangsa Chandra, I kedis celepuk,matane care bintang kembar,bungut ne lanying,makuku rangap,sabilang masuara nakutin pisan.takut-takut bani ia metakon teken I celepuk unduk kasujatian ne madan peteng.
Wangsa Chandra
“Yen awake ngalih peteng,ne jati-jati suksmane peteng,nto duluh ne madan lemah,mawinan dilemahe ade peteng,digalange petenge lakar ngenah,ditu mare tepuk ne kasambat peteng” saut I celepuk .
Bengong I sangsiah disisin telagane,ningeh munyi ane budang bading.Ngenehang dipetenge ngenah galang, galange misi peteng.
Nah ..nah yen sube keto awake jani mapineh, ape nto galang,ape nto peteng,ane engken madan suka,ane engken nemu duka,dija maadan sisi dija maadan tengah.Jelan budang badingan kenehe,amuter tutur..saget kaliwat baan..nu liu kamar kosong di rumah sakit jiwa.