Barak ngurub tejan sang surya,I Cangak sube sayage lakar nyurya sewana,katuturang I cangak sube ma-dwijati,sube dadi sulinggih,sube meganti adan,sube ngelarang dharma agama, tusing dadi gelurin I cangak. cutetne Ida nak lingsir.
Yen lantas tepuk di rurunge patut kasapa Ida nak lingsir, keto masi yen iye mecapatan pastika ngorahang cening, yadiastun cenik,tua,wayah nguda makejang orahange cening.
Sakewale tusing makejang kramane inget, taen saje ade ne engsap lantas ngaukin adane I Cangak,Sekadi sang Dorakala peliatne ne,mata barak,semu galak ngalahang semu Ida Hyang Durga krura,dikenehne matbat anake totonan, tusing ngelah tata krama.
Ade lantas ne tangkil ke pasramanne,nyakupang lima,angayubagia “ Om Swastyastu,Ida nak linggsir,suryan titiang” mimih prajani I cangak makenyung manis,mapeliat putus,mabaos alus tur dabdab.
” Yeh cening I Sangsiah,tumben cening nangkil semengan”, Keto munyin I Cangak sambilange ngedengang jerijine ane bek misi bungkung batu, ade batu mirah,batu telaga,batu les,kayang batu duren masi ade.
“Asapuniki Ida nak lingsir”, mare keto dingehe, kebit-kebit bulu ikuhne I cangak,liang kenehne, lega atine
”Tatujon titiang nangkil,jagi nakenang kepatutan bakti lan mabakti ida” ,saut I sangsiah lantas ngebitang bodag ne abane tuni,ditu misi canang sari maimbuh sesari satak tali. I Cangak nepuk sesari satak tali, kerasa-rasa Ida Sanghyang Saraswati tedun di pabaane,jak prejani tis uli sirah ngantos ke kukun batis ne.
”Care kepupungan nakonang ane keto-keto, yen Bakti lan Mabakti takonang cening,tolih ditu dugas ida muput pujawali di pura puseh,kramane sube pade eling tur wikan tekening tata cara,pidan sekonden ida melinggih dadi sulinggih dot sugih”. Atah I cangak buka kartu
“ keweh sajaan ning” lantur I Cangak
Ida Nabe mabesen buka kene “.. Asana nto apang melah tetegake,batis tusing rejeng semut,kuping tusing but muring, sube lantas keto mare me-Pranayama,kenken angkihane macelep,kenken mekek angkihan,kije pesun angkihane, nto malu dabdabang, ngelantur mersihin lima kiwa tengen,kapucukin ngujarang mantra,ngujarang masi apang alon tur ngulangunin keneh,nunggalang sabda,bayu lan idep,nyihnayang bhakti ring ida hyang parama kawi, apang tusing care kepung bangkung,meuber-uberan mantra kramane ngajak genta sang sulinggih,ulian sang sulinggih uberin mantra,kayang muyin gentane pati kaplug.” ngepah I sangsiah madingehang.
“Sakewale yen nto jani tuutin sube tusing jaman ning” I cangak menahang kampuh,care patih Maguna Taskara mare medal uli lawangan ne. “Jani makejang sube enggal, Genta sang sulinggih nu mamunyi kramane suba parama santhi,ade ne tileh negak di jeroan,ade ne ngengalang ke madya,ade ne ngelap-ngelap ke jabaan pura”.
Ngenyit roko I Sangsiah,ngelepus andus ne ilang di embange,mirip lakar dawe tutur ida nak lingsir.
Ngoceh I Cangak care crukcuk ujanan “Kramane di jeroan ade nuturang dewek ne kacumpu,kacunduk,kasenengan,ngayah tur ngiring,maan panugrahan,nawang men anu tuwuh ne tuah buin asasih,pan nto sakit ne kene bebai ,sakewala iya engsap ngejang sandal ane meli aji ayuta,ape di jabaan,madya,jeroan tusing sube tepukinne mirib panugrahane konden nganteg kemu.”
“Len di jeroan len masi dimadya,istri-istrine, lima tengen ngisang hp lima kiwa ngukup bedogol,sambilange ngejengit lan munju apang patuh care bedogol ane di samping,ape nto mawinan dadi ngenah jegeg care apsari,tusing sube tawang..sebilang wai tinggalin bedogol nto tusing masi jegeg, yen aeng saje.”
“Di Jabaan ngaeng-aengang tepuk,kramane ne lanang-lanang ngadu kawisesan di batan punyan baingin, ne metik di samping candi bentar, makebat tikeh,di tengah ade rerajahan catus pata mewarna selem,rajah tamas mewarna barak,rajah porosan warna gadang,saling sorog,ade ne nungging,ade nyongkok,ade ne ngakak,ade ne ngeregeh care Ni Guyang ngeregepang aksara,yen melahang tolih rerajahan nto mesesari, limang keteng,telung benang, siu” Aruh ngadu kawisesan ..nak meplalian bola adil nto adane cangak!
“Sang prajuru melenan masi,lakar kone ngadaang tabuh rah,mapan nto mungguh di shastrane,sakewale apang tusing keweh,apang aluh,lakar adaange buin duang sasih di subane piodalane masineb,mebakti maan,mebati payu.”
Akatih tlah roko ne,buin ngenyit,ngelepus ilang di embange, ngangsan ngebus-ngebusang jit ne I sangsiah ningeh tutur.
“Yen Bakti,tusing kewatesin desa,kala lan patra, rasa nemautama,tusing keni gegodaan dewa utawi bhuta,nto metu uling manah ane sujati” miribang sube dasa kropak tuturne I cangak konden masi pragat.
“Mabakti ade watesne kewatesin olih dresta utawi tata cara,ade kepatutan ne,patut mebaju lan kampuh ne kedas miwah ane siosan,patram,puspam,dupam,toyam lan palam anggo dasar ne.tatwa lan shastra anggo guru”
“Men yen Mebati?” petakon I Sangsiah, “Sttt..gigisin bedik nig,sing juari dingehe ken pengayah ida” saut I Cangak kisi-kisi.