Matan ai sube tegeh,angin ngesirsir ngetisin awak,tusing asen sube I Sangsiah unap-unap di sekepat ne meraab seng.
Kriiing..munyin telpon di meja Sang Suratma “Om Swastyastu,mekele..niki wenten pinunas saking mercepade,daweg rahina benjang,panjak-panjake jagi ngelaksanayang upakara tirta gamana” keto pesaut telpone.
“Meen …?” Saut sang Ciptagupta bawak, “Duaning Men Ayu dados raja dewata mangkin,pratisentana ipun mapinunasan mangda sami raja dewata ipun jagi kaingkup raris katangkilang ke dalem puri miwah sane lian-lianan”
“Adeng-adeng malu..bape nyemak buku” sambilang ngebit-ngebitang buku sang Ciptagupta lantas mesaut “nyen gen nto ne lakar tuun ke mercapade?”
“Dumun dugas di mercepade adan-adan ipune Made Basur,Pan Lanus,Men lekig,Pan Ribek,Nyoman Denges..nike makesami mekele”.
Lantas sang Ciptagupta ngelurin parekane makejang “Ih para bhuta kita…jani alih atma-atmane totonan,ajak mai!”
Bawak satue atmane ne teka tuah Pan Lanus teken Men lekig,metakon lantas Sang Ciptagupta “Men Nyoman Denges,Pan Ribek tekening Made Basur Dija?” petakon ne paling.
Bhuta Jenar lantas mesaut “Ih ..Nyoman Denges lan Pan Ribek sampun manumadi, Ih ..Made Basur duaning melajahin dharma putus dugas di mercepada tusing manira tepukin jani atmane,alih di swargaloka tusing ade,alih di narakaloka masi nihil,ditegal penangsaran sing ngenah, ape buin di bale pengangen-angen tusing ade ngabsen.”
Pengeng Sang Ciptagupta,sambilange ngemigmig pedidine “I manusia tuah sing ade gae,..ane sube beduur tuunang ane beten penekang,Kaden aluh ngurus atma?wulung dasa patpat soroh atma ne ade,konden diswargaloka,di narakaloka ape buin di mercapade.nto makejang kake ngurus”.
“Ih..bhuta kita ,tuunang ne dadue totonan..masi I Manusia tusing lakar nepukin,yen kekene terus adenan sube kake pensiun”. Keto titah Sang Ciptagupta tekening para bhutane.
Kaceritayang jani di mercepade,sube lanus pejalan tirta gamana ne,linggihange jani Men Ayu di rong tiga,pakedek pakenyung para pratisentanane mapan upacara lan upakarane sube pragat.
Mekeber Atmane Men Ayu menek,sakewale ape krana banten ne kuang,ape mantra ne lebihan,nyasar lantas ia ke Jagat Dewantara bengong ditu nepukin Aryya brahma nutur tekening Arrya Wisnu.
“Dening akeh kabawosang,pidabdab ngasthawa widhi,kakardhin antuk bhatara,katah indike nampenin,nampenin ida sang hyang widhi,pidabdabe twara patuh,reh tutur sunyane katah,uling malu kayang jani,twara tepuk, yen kenken rupan dewa?” Bawos Arrya Brahma
“Manah Dewekne ngawinang,bise mangadanin widhi,to lantas gehenang sanggah,gahenang banten hodalin.ape ke ada nepukin ne nampi bantene katur,mirib twara je sengeh,pade sahud,mantrane enen manawang”.
Mare ningeh keto uli dija Kaden teka ombake gede,ngulung Men Ayu…Byurr
“Bangunnnn..medem dogen iban caine” ngerepak I Sangsiah ningalin bapane ngabe ember,merasa awak ne maukud belus
“Sampi konden ngamah,kucit pade uyut,ubuhane makejang konden mapiara..tong sing ade gae lenan teken medem?” munyin bapane bangras.
“Beh bape ape tawang, Icang ngipi nepuk sang Suratma,ngipi melali ke jagat dewantara..minab icang lakar ngiring buin pidan” saut I sangsiah sambilange mekaad mulian meten lakar nganti bajune ane belus.
“Yen dot kal melajahin agama,igama lan ugama,ngayah tekening ida ring griya,tusing pragat ulian baan ipian” bapane ngumik.
“Sube..sabilang saniscara peteng icang ke griya ngalih ida”saut I Sangsiah di jumaan meten.
“Men..men di Griya dija cai melajah?” ngenduk lantas munyin bapane
“Di griya bunga residence..ditu ade Ida Ayu janda muda uli Denbukit” Saut I Sangsiah.
Brakk..munyin jelanan umah ne.. sabate aji sandal “Eh panak leak ibe..”