Nyen Awake ?
Titiang soroh pasha,machina lelima sane kasenguh paksa,jaya,guna,ketek lan kiul,kaandanin tyang ne kuna-kuna sekadi I bungkem,I belang,I selem miwah sane lian-lianan.Tiang satya pisan marep teken I manusia,nanging lara panumadian tyang,sedina-dina I manusia engsap tekening peragaan tyang.
Malenan pisan sayang I manusia marep peragaan tyang tekening penyamaan tyange uling duranegara, yen tyang ka sambat cicing,nyaman tyange uli duranegara kasambat shih-tzu ,pom,golden miwah sane lian-lianan,lemah peteng tyang ujan kebusan di natahe,nyaman tyange aken mesaput,megaleng,naar ne jaen-jaen, ati siap,be sampi miwah ne tiosan ,tyang paling aget maan sisan-sisan I manusia.
Men abe bisane?
Yen nakenang unduk punika,manut ring lontar carcan asu,telung dasa siki kautaman titiange minakadi :
1. Asu gong sabarung,munyin tyange gede,mewibawa patut tyang meparekan tekening I manusia sane dados penguasa jagat
2. Asu rajeg wesi,bulun tyang poleng,mate selem,sekancan desti tusing bani ring peragaan tyang
3. Asu I puser taun,ade usuhan di cadik tyange,sekancan gumata-gumitit takut yen tepukin tyang
4. Asu mabulu barak,layah tyange bolong utawi rengreng ,tusing ade tongos ne tenget lakar ngalahang tyang,kala dengen masi lakar megisir
Men ape buin? Ampura kenjel tyang nulis.
Ring swargarohana parwa Ida Sang Dharmasuta kasarengin olih asu putih, ring babad malih munggah mahapatih ki Pasung Grigis masi maduwe asu selem. Nike kautaman soroh cicing.
Knapa adi sebet kenehe?
Inget tyang dugas anggarkasih sane sampun liwat, tepuk pemekel tyange nguling bawi,dingeh-dingehang tyang lakar aturange drika ring pura dalem purwa sane misi patung kuluk selem.bungah manah tyange,liang rasane lakar maan paduman be guling,di subane lantas neked di patung totonan,ngelencok gulinge,ngetel lengis ne,silap-silap layahe ngantiang,sakadi I bramara ngisep madu I manusia mejapa-japa,kadang keras kadang siep ampehang angin.
I Manusia ngidem mapinunasan,adeng-adeng tyang lakar nyilapin guling totonan,kulitne barak gading,mekalung urutan,mesengseng tumpeng,konden ade kutus langkat,uli dija Kaden teke celebingkah ngulungin tendas titiange,sakit tan ketulung-tulung tyang.
Lantas I Manusia matbat paukudan tyange,Cicing sing ngelah keneh,guling nu katuran kal caplok kai? Keto munyin I Manusia, jengah tyang tusing pedas ngenehang, sube katurang ke patung kuluk totonan,tyang ne ngelah soroh punika,ngudiang patung aturin, dasa tiban tusing lakar patung e totonan nyilapin guling,dija kepatutane??
Yen buin pidan manumadi ape ketagih?
Yen dados tyang tunas mangde tyang manumadi dados manusia,sakewale yen kari tyang manumadi dados cicing titiang nunas mangda lekad tyang di gumi goak,dumun kasambat denbukit tan purun tyang ring gumi sikep.
Adi keto?
Ring gumi sikep soroh paksi mautama,sami cele-puk drika dados sane utama,yening ring gumi goak soroh tyang ne mautama,uli petani dados raja soroh tyang ne kasambat.
Nden-nden malu,kenken ne?
Dingeh tyang I manusia yen tepuk sawitra ipun, ngorahang “Cicing cai dadi mangku jani,Dadi bos Cicinge ne,Cicing jegeg kuranan cai ne”
Sadina-dina tusing tepuk soroh cicing nguyeng genta,ape buin menek montor ne melah tur maal,soleh masi tyang dingehang ade cicing jegeg,tusing taen cicing masuk salon ,mare di obag-obag jelanan sube ade sandal mekeber.