Matane nelik,layah pesu batisne nengkleng minab Ida Bhatari durga sampun tedun ngerauhin keto kisi-kisi kramane dugas piodalan di pura dalem, I Goak ne kerauhan gelar-gelur,geram-gerem makejang kramane ngon ngingalin.
Tusing taen absen yen sube ade piodalan, setate I Goak paling malune kerauhan,ape mirib sayang pisan ida betara tekening I Goak.
Makeneh-keneh I Sangsiah, yen sikutang baan rasa bakti, awake tusing je kalah teken I Goak,yen baan ayaban uling isin tegal kanti isin supermarket misi ditu,de je sebatak rauhine tundik ida batara masi tuare.
Maan dugas di bale pamebatan I Sangsiah nakonang unduk kerauhan ne I Goak, boya pitutur ne bakate munyi bangras lan pisuh ne tampine,makejang kramane ngorahang I Sangsiah tulah lan meboya ajak widhi.
Tepukine sabilang wai I Goak mekamen lan baju putih-putih,bok ne maprucut,ape nto nyiriang kenehne sube suci lan Nirmala ape nyaruang bulune ane selem, tusing be pedas tawang, nanging yen sube kerauhan sai ngorahang ida liang,ida duka,ne patut,nto sing cocok, ngelintangin pemargi ida, ida mapaica cutet makejang ida, pokok ne ida..ida lan ida sing ade ne lenan.
Ulian jengah lantas I Sangsiah melajahin sastra uli tutur gong wesi, sangkul putih,weda parikrama nganti sundari bungkah pelajahine, ne penting melajah manut sing manut buin pidan itungang keto di keneh ne.
Bawak satue mapewinten lantas I Sangsiah kajumput dadi jan bangul di pura prajapati,nemu piodalan,I Sangsiah dadi mangkune,tepukine disamping ne I Goak sube sayage,sayage lakar kerauhan ape sayage lakar ngaturang bakti,makeneh-keneh I sangsiah.
“ning..ning..ning” munyi genta ne I Sangsiah lantas iya memantra “Om Brahmà Prajàpatih sresthah
swayambhur warado guruh” “whahahah…hemmm heemmm” makesiab I Sangsiah ngatos gentane mentungan dapetange sube I Goak kerauhan.
Len I Sangsiah, len kramane.makejang nyeluk HP ade ne selfie, ade ne update status di facebook nulis “Ida Prajapati tedun..seram coy” ade masih nak luh mare metuwuh bajang live di sosial mediane sambilange bujuh-bujuhange bibihne bedik apang ngenah jegeg “ Hi guys..gue lagi live dengan ida prajapati lho….”.
Bengong I Sangsiah di sekepat ne,ngenehang unduke totonan, inget tutur wayahne “kerauhan boye je pelih sakewale apang manut ngajak wiweka,jnana lan vijnana, apang tusing sabilang punya kayu gede nagih pelinggih,jurang-jurang isinin pelinggih,kayang dirurung-rurunge masih,men nyen lakar ne ngaturin ? Ida bhatara nyen ne melingih ditu? Dong tuna gati ida bhatara ngantos kemu mai nagih pelinggih!”.
Kocap tumpek saraswati, I Sangsiah maan duman tugas di pura Taman, dapet masi I Goak sube ade di durine, “ning..ning..ning” munyin genta ne, ngujarang mantra I Sangsiah “Om Namo Bhagavate maha sudharshana vasudevaaya dhanvantraye”
I Goak kipek kileng, tundikine lantas I Sangsiah “Jro..jro mantra napi nike,adi dong Saraswati puja” petakon I Goak.
“Ampura jro niki dhavantari puja, ida bhatara sane nuwenang yoga lan Ayurveda, jro jagi kerauhan ..durusang, bise jro nagel-nagelang lima batis care guru-guru yoga totonan?