Saniscara umanis watugunung, I Goak masila tiding di beten punya jepune ane sube tusing mebunga “Jani gumine sube wayah,ane melah dadi jelek, jelek kesambat melah” I Goak nyatue
“adi keto bli?” I Sangsiah mesaut bawak
“Tusing cai tawang, jani liu sampradaya-sampradaya uling gumi bharata,teka ke balidwipa, yen iraga lipya sinah budaya bali, gama bali lakar ilang” tutur I Goak memanas nganti matane makedadue barak
“Ape ne ngeranang keto bli?” buin bawak pesaut I Sangsiah
“Nto tingalin pedas-pedasang ningalin, yen Irage masila,matimpuh mebakti..ngudiang nto majujuk,ancog-ancog magending misi magirang-girangan” ngangsan memedih I Goak
“Buine tingalin pepayasane..tusing nyiriang budaya bali, ngango baju care daster maslempang kancerik tusing ade ane makebaya,mekamen masenteng maudeng, ape buin ane sembahe patung jeleme, beneh papelajahane totonan?”
“Tegarang alon-alon malu bli,minab jani gumine gumi kali,Hyang Kali nyupat yuga, jelan nyiksik bulu mulat sarira” I Sangsiah mamunyi,pliatne joh nerawang
“adi mare jani bli kapupungan,pati dampluk, ngabe suluh prakpak kemu mai, manutang di sastrane bli nto, tulyā ning kukunang harep mamadahen sasadhara mapadang ya topama, care I Kunang-kunang lakar nyaingin I Bulan yen tyang umpamiyang.”
“Tusing bli rungu ade pura-pura di bali ani misi klenteng misi pagoda,misi patung dewi guan yi, sambilang mejujuk lima ngisang dupa trus angut-angut di arep patunge, nah tegarang nto malu kenehang bli, ngudiang nto bli sing uyutang masi?”
“Jelan jani maguru sastra, Gu ngaran peteng, Ru ngaran galang, ane ngae petenge dadi galang tuah sing ade len sang hyang aji,sang hyang guru, kedasarin baan sastra”
“I kompyang I buyut metetamian lontar,sastra lan pituduh nto anggo sesuluh, mare ngelah lontar sabilang rahina bantenin,pingitang gati, tusing dadi kebitang, ngelantas usak amah ngetnget, meh ..bisa-bisa glalang gliling ngeling ibuyut ikompyang di kedituan ulian sentanane belog metadah ajum.”
“Ane melah duduk ane jelek kutang,gama bali ane engken bli kal orahang, ipidan ade sia gama di bali,Bhairawa,Pasupata,Brahmana,Siwa sidhanta,Waisnawa,Rsi,Sora,Ganapati lan Bodha utawi baudha”
“Nindihin gama nindihin budaya tyang masih demen bli, sakewala beda-bedayang engken uli keneh ne sujati engken ane uli suryak siu,men bli tusing demen ancog-ancog,gendang-gending de barengine,yen bli nu demen makamen mesaput maudeng lan masila dinuju mebakti jlan jalanin nto,yen tusing ulian dewek irage pedidi ne lakar masatya tekening budaya nyen buin?”
“bli nawang bebali,wali,keling,endek,cepuk,gringsing,songket,prada teken cecawangan?” I Sangsiah metakon
“Songket,prada,endek tawang ne len sing tawang” saut I Goak
“Men yen brokat Varanasi,Syria,perancis,semi perancis tawang? “ buin metakon I Sangsiah
“Beh yen nto tawang gati diastun awake ngoyong di desa,tusing lakar kalah jaman kalah mode,apang jegeg masi kurenane ngenah” ajum I Goak
“ulian ane care-care bli sube ngeranaang budaya ne ilang,kain bebali,wali lan keling suba tusing ade ulian ganti bli aji Varanasi,Syria utawi semi prancis totonan,”
“Di munyine mekuwug aengan teken gajah Supratika ngamuk di kurusetra, ngorahang nindihin budaya sakewala sedina-dina de ja suaran angklung, gender utawi gong mamunyi di natah bline,ane dingeh tyang munyi gending-gending dura negara dogen”
“Cutet sing terima, Awake satya mabela pati teken budaya bali” saut I Goak
Konden pegat pesaut ne I Goak, lantas mamuyi Hpne matembang india “Shakti hain bhakti hain,
Janmo ki mukti hain,…” gending sinetron mahabhrata anggone nada dering
“Tong dayanin,kalingan ajak mebalih wayang,nada dering dogen sube gending india” I Sangsiah mesesimbing
“Sieeeeeppppp … mama muda nelpun ne” I Goak ngisang hp” Halo sayang….yo wis aku melok..demi cintaku,aku ikut sampai ke ujung dunia” munyi I Goak nyautin Hp ne
Duh…de engsap jak bali nah bli